Advertisement 1

राघबेन्द्र चौबे –

कपिलवस्तुको सशस्त्र प्रहरी बल प्रस्तावित सीमा सुरक्षा गुल्म चाकरचौडाका प्रमुख नायब उपरीक्षक (डिएसपी) हरीबहादुर गुरुङले तस्करसँग मासिक रकम असुली गर्न नयाँ रणनीति अपनाएको खुलासा भएको छ।सशस्त्र प्रहरी बलकै मिलोमतमा रङ्गपुर, कचरियाहवा हुँदै चाकरचौडादेखि दैनिक रूपमा चामल, लत्ता कपडा, हार्डवेयर सामग्री तथा किराना सामानहरूको अवैध ओसारपसार भइरहेको छ।

Advertisement 2

सशस्त्र प्रहरीको सीमा सुरक्षाको जिम्मेवारी भएको गुल्म क्षेत्रभित्रै तस्करी मौलाउँदै गएको देखिन्छ। नायब उपरीक्षक हरीबहादुर गुरुङको नेतृत्वमा रहेको टोलीले तस्करी नियन्त्रण गर्नुको सट्टा, यसको संरक्षणमा भूमिका खेलिरहेको पाइएको छ।

गुल्मअन्तर्गतको ३८ किलोमिटर क्षेत्रफलमा तस्करी नियन्त्रण गर्नुको साटो, डिएसपी गुरुङ आफैंले तस्करीलाई संरक्षण गर्दै आएको तस्करहरूले बताएका छन्। गुरुङले जवान अर्जुन चौधरीलाई ‘कोटमास्टर’ को रूपमा नियुक्त गरी सादा पोशाकमा दिनभरि बाहिर खटाउँदै आएका छन्। तस्करसँग विश्वासपात्रको रूपमा प्रयोग गर्दै मासिक रूपमा रकम असुली गर्दै आएका छन।

तस्करहरूका अनुसार चौधरीले दिनभरि फिल्डमा बसेर तस्करी हुने स्थानहरूबाट पैसा उठाउने काम गर्छन् भने तस्करीको सामान आवत–जावतको जिम्मा भने स्वयं डिएसपी गुरुङले लिने गरेका छन्। यसरी चलाइएको प्रणालीले गुल्म क्षेत्रमै व्यापक भ्रष्ट्राचार र गैरकानुनी क्रियाकलाप बढाएको आरोप लागेको छ।

स्थानीय बासिन्दाहरूले तस्करीको नियन्त्रण गर्नु पर्ने निकाय नै तस्करीमा संलग्न हुँदा राज्यको सीमा सुरक्षा प्रणालीमाथि गम्भीर प्रश्न उठेको छ ।