Advertisement 1

धनन्जय उपाध्याय/रुपन्देही 

मिति २०८२/०८/०२ गते इलाका प्रहरी कार्यालय मझगावाँले कोटाहीमाई गाउँपालिकाको सभा हलमा नागरिक सुनुवाइ कार्यक्रम सम्पन्न गरेको छ। स्थानीय सुरक्षाका मुद्दा, जनगुनासो तथा समाधानका उपायहरूबारे प्रत्यक्ष संवाद गराउने उद्देश्यले आयोजना गरिएको कार्यक्रममा सर्वसाधारणदेखि स्थानीय जनप्रतिनिधिसम्मको उल्लेखनीय सहभागिता रहेको थियो। कार्यक्रमको सञ्चालन प्र.स.नि. सुभाष थारुले गरेका थिए। सुरुवाती सत्रमा उनले नागरिक र सुरक्षाकर्मीबीचको सहकार्यबिना शान्ति–सुरक्षा मजबुत नहुने भन्दै जनगुनासोलाई प्राथमिकताका आधारमा सम्बोधन गरिने प्रतिवद्धता व्यक्त गरे।

Advertisement 2

कार्यक्रमको अध्यक्षता गरेका प्रहरी निरीक्षक तपेन्द्र बिष्टले मझगावाँ मातहतका क्षेत्रमा भइरहेका आपराधिक गतिविधिहरूबारे विस्तृत जानकारी गराउँदै चोरी, कुटपिट, मदिरा दुरुपयोग, पारिवारिक हिंसा, तस्करी तथा लागूऔषध ओसारपसार जस्ता घटनाले स्थानीय सुरक्षा चुनौती बढाएको बताए। उनले जनगुनासोहरूलाई शीघ्र समाधान गर्दै आगामी दिनमा निगरानी र नियन्त्रण कार्यलाई अझ प्रभावकारी बनाइने आश्वासन समेत दिए।

कार्यक्रममा सहभागी स्थानीयहरूले समेत खुलेर आफ्ना समस्या र सुझाव राखेका थिए। पत्रकार तथा समाजसेवी धनन्जय उपाध्यायले मर्चवार क्षेत्रमा तस्करी, धार्मिक द्वन्द्व, आत्महत्याका घटनामा वृद्धि तथा लागूऔषध ओसारपसार जस्ता गतिविधि बढ्दै गएको उल्लेख गर्दै प्रहरी प्रशासनले कडा र दीर्घकालीन रणनीति अवलम्बन गर्नुपर्ने माग राखे। त्यस्तै, स्थानीय दुर्गाप्रसाद चौधरीले प्रहरी तथा सशस्त्र प्रहरीका घुमुवा टोलीका कारण जनतामा त्रास बढेको गुनासो राख्दै यसको समाधानबारे प्रश्न गरे, जसमा प्रहरी निरीक्षक बिष्टले आवश्यक छानबिन र कारबाही गरिनेसमेत स्पष्ट पारे।

कार्यक्रमका प्रमुख अतिथि कोटाहीमाई गाउँपालिका अध्यक्ष बालकृष्ण त्रिपाठीले सुरक्षा गाउँपालिकाको प्राथमिकता भएको बताउँदै प्रहरी–प्रशासन र स्थानीय तहबीचको समन्वयलाई अझ मजबुत बनाइने धारणा राखे। विशिष्ट अतिथि प्रमुख प्रशासकीय अधिकृत अजय कुमार मिश्र, उपाध्यक्ष सुशीला यादव, वडा अध्यक्षहरू, शिक्षक, समाजसेवी, संघ–संस्थाका प्रतिनिधि तथा स्थानीयबासीको उपस्थितिले कार्यक्रमलाई अझ प्रभावकारी बनाएको थियो।

यस प्रकारको नागरिक सुनुवाइ कार्यक्रमले नागरिकलाई आफ्नो समस्या प्रत्यक्ष रूपमा सम्बोधन गर्ने अवसर प्रदान गरेको छ भने प्रहरीलाई स्थानीय अवस्थाबारे वास्तविक जानकारी प्राप्त गराएको छ। कार्यक्रमले जन–प्रशासनिक सहकार्य तथा विश्वास अभिवृद्धि गर्दै स्थानीय सुरक्षा सुदृढीकरणमा महत्त्वपूर्ण प्रभाव पार्ने विश्वास व्यक्त गरिएको छ।