Advertisement 1

रौतहट, जेठ २०

रौतहट जिल्लामा आफैलाई पत्रकारको परिचय दिँदै हिँड्ने रमेश मुखिया नामक व्यक्तिले एक विवाह समारोहमा हातहतियार देखाएर उत्पात मच्चाएपछि जिल्लामा नै सनसनी फैलिएको छ।

Advertisement 2

प्रत्यक्षदर्शीहरूका अनुसार, रमेश मुखियाले विवाहस्थलको मञ्चमा राइफलजस्तो देखिने हातहतियार बोकेर भिडियो खिच्दै सामाजिक सञ्जालमा पोष्ट गरेका छन्। उनको यस्तो हर्कतले उपस्थित पाहुना र स्थानीय जनसमुदायमा त्रासको माहोल सिर्जना गरेको छ। सामाजिक सञ्जालमा उनका तस्वीरहरू भाइरल भएपछि घटनाले झनै गम्भीर मोड लिएको छ।

नेपालको प्रचलित कानूनअनुसार, सार्वजनिक स्थलमा हातहतियार देखाउन कडाईका साथ प्रतिबन्ध छ। शान्ति सुरक्षाको हितमा यस्ता गतिविधिमाथि निगरानी राख्नुपर्ने भए पनि रमेश मुखियाले खुलेआम हातहतियार प्रदर्शन गर्दै कानूनको खिल्ली उडाएको देखिन्छ।

स्थानीय बासिन्दाहरूका अनुसार, यस्तो गतिविधिले विवाहजस्तो पवित्र समारोहलाई नै आतंकित बनाएको छ। एक प्रत्यक्षदर्शीले भने, “पहिला त लाग्यो कुनै सुरक्षा अधिकारी होला कि भनेर, तर पछि पत्रकार भनेर चिनिने मान्छे रहेछ भनेर झनै अचम्म लाग्यो।”

जिल्ला प्रहरी कार्यालय, रौतहटका प्रवक्ता प्रहरी निरीक्षक तथा सूचना अधिकारी दीपक कुमार रायका अनुसार, “सार्वजनिक स्थलमा हातहतियार देखाएर सर्वसाधारणलाई त्रसित तुल्याउने कार्य गैरकानुनी मात्र नभई शान्ति सुरक्षामाथि प्रत्यक्ष प्रहार हो। यसबारे हामीले अनुसन्धान थालेका छौं र रमेश मुखियाको खोजी कार्य तीव्र पारिएको छ।”

प्रहरी स्रोतले जनाएअनुसार रमेश मुखियाले पत्रकारको पहिचान दुरुपयोग गर्दै व्यक्तिगत प्रभाव जमाउन हातहतियार प्रदर्शन गरेको हुनसक्ने आशंका गरिएको छ। प्रहरीले घटनास्थल वरपरका मानिसहरूसँग बयान संकलन गरिरहेको र उक्त हातहतियार कहाँबाट कसरी ल्याइएको हो भन्नेबारे पनि अनुसन्धान जारी रहेको जनाएको छ।

यस घटनाले पत्रकार आचारसंहितामाथि पनि गम्भीर प्रश्न खडा गरेको छ। नेपाल पत्रकार महासंघका एक पदाधिकारीले भने, “पत्रकारिताको नाममा यस्तो गतिविधि हुनु निकै लज्जास्पद हो। यसले पत्रकार पेशामाथि नै प्रश्न उठाउँछ, र प्रशासनले यस्ता घटनालाई तुरुन्त नियन्त्रणमा लिनुपर्छ।”

विवाह समारोहका आयोजक पक्षले समेत प्रहरीमा बयान दिने तयारी गरिरहेको बुझिएको छ। “विवाहको रमाइलोमा यस्तो हर्कत हुँदा हामी आफैँ पनि त्रसित भएका छौं,” एक आयोजकले प्रतिक्रिया दिएका छन्।

यसरी पत्रकारको नाममा हातहतियार देखाएर आतंक मच्चाउने प्रवृत्तिलाई तत्काल नियन्त्रणमा लिन नसकेमा समाजमा गलत सन्देश जाने र हिंसात्मक गतिविधि बढ्न सक्ने स्थानीयबासीहरूले बताएका छन्।

जिल्ला प्रहरी कार्यालयले घटनालाई गम्भीरतापूर्वक लिएर अनुसन्धान तीव्र पारेको र दोषीलाई कानुनी दायरामा ल्याएर कडा कारबाही गरिने जनाएको छ।