Advertisement 1

सतेन्द्र मिश्र/भैरहवा

मङ्सिर ११ गते, बिहीबार जनमत पार्टीको जिल्ला समन्वय समितिद्वारा आयोजित जिल्ला समिति बैठक तथा निर्वाचन प्रशिक्षण कार्यक्रम भैरहवाको होटल पौवामा सम्पन्न भएको छ। कार्यक्रमको अध्यक्षता जनमत पार्टी रुपन्देहीका जिल्ला इञ्चार्ज तथा अनुसन्धान एवं भ्रष्टाचार निवारण प्रमुख सञ्जय कुमार मिश्र ले गरेका थिए। कार्यक्रमका प्रमुख अतिथि जनमत पार्टीका राष्ट्रिय अध्यक्ष डा. सीके राउत (चन्द्रकान्त राउत) रहेका थिए भने विशिष्ट अतिथिमा पार्टीका राष्ट्रिय सचिव भूपेन्द्र प्रसाद यादव उपस्थित थिए।

Advertisement 2

कार्यक्रममा केन्द्रीय कार्यकारी सदस्यहरू रामकेश गुप्ता, राजेन्द्र गुप्ता, निर्मला हरिजन, नीलम पासवान, कमल नारायण चौधरी, अर्जुन जयसवाल लगायतका पदाधिकारी तथा विभिन्न स्थानीयवासीहरूको उल्लेख्य सहभागिता रहेको थियो। कार्यक्रममा आफ्नो मन्तव्य राख्दै अध्यक्ष डा. राउतले निर्वाचन प्रशिक्षणलाई प्रभावकारी, सचेत र जनमुखी बनाउनु पर्नेमा जोड दिएका थिए। उनले जनमत पार्टीको मूल सिद्धान्त तथा संगठनिक अनुशासनअनुसार जनताको बीच इमानदारी, सेवा र पारदर्शितासहित क्रियाशील हुन कार्यकर्तालाई आह्वान गरेका थिए ।

यस्तै, राष्ट्रिय सचिव भूपेन्द्र प्रसाद यादवले कार्यकर्ताहरूलाई “सिपाहीजस्तै अनुशासित र जागरुक” भएर काम गर्नुपर्ने उल्लेख गर्दै भनाइ राखे। उनले निर्वाचनको समयमा रक्सी–मासु बाँडेर जनतामाथि प्रभाव पार्ने राजनीतिक संस्कृतिलाई हटाउन अनुरोध गरेका थिए र अब कोही पनि त्यस्तो प्रलोभनमा नपरि सत्य, निष्ठा र लोकतान्त्रिक मूल्यको पक्षमा अघि बढ्न आग्रह गरेका थिए ।

त्यसैगरी, जिल्ला इञ्चार्ज तथा अनुसन्धान एवं भ्रष्टाचार निवारण प्रमुख सञ्जय कुमार मिश्र ले आफ्नो मन्तव्यमा रुपन्देहीमा पार्टीको संगठन विस्तार, जनताको समस्या पहिचान तथा समाधानमुखी अभियानलाई अझ सुदृढ बनाउन प्रतिबद्धता व्यक्त गरेका थिए। उनले जनमत पार्टी भ्रष्टाचारविरुद्ध शून्य सहनशीलताको नीतिमा दृढ रहेको र जनताको हकहितका मुद्दामा कुनै सम्झौता नगर्ने बताए। मिश्रले आगामी निर्वाचनमा रुपन्देही जनमत पार्टीको लागि सम्भावनाले भरिपूर्ण क्षेत्र भएको बताउँदै सबै कार्यकर्तालाई संयम, सक्रियता र एकतासहित जिम्मेवारीपूर्वक भूमिका निर्वाह गर्न आग्रह गरेका थिए ।कार्यक्रम उत्साहजनक वातावरणमा सम्पन्न भएको जनमत पार्टी रुपन्देहीले जनाएको छ।