Advertisement 1

भैरहवा, १२ मंसिर ।

राष्ट्रिय प्रजातन्त्र पार्टी (राप्रपा) को स्थानीय तह परिचालन विभागको रुपन्देही जिल्ला संयोजक चयन एकल एवं शासकीय पद्दतिमा गरिएको भन्दै उक्त निर्णयप्रति आपत्ति जनाइएको छ ।

Advertisement 2

राप्रपा निकट राष्ट्रिय प्रजातान्त्रिक युवा मोर्चा, राष्ट्रिय प्रजातान्त्रिक युवा संगठन र राष्ट्रिय विद्यार्थी संगठन रुपन्देहीले पार्टीको केन्द्रीय निर्वाचन विभाग, स्थानीय तह परिचालन विभाग र राप्रपा जिल्ला कार्यसमिति रुपन्देहीलाई पत्र बुझाउँदै यसबारे ध्यानाकर्षण समेत गराएका छन ।

पार्टीको कुनै पनि आधिकारिक निर्णय तथा कार्ययोजनाको बारेमा समेत जानकारी तथा छलफल समेत नगराई एकल निर्णय गर्दै पार्टीलाइ शासकीय पद्दतिमा चलाउँदै आएको भन्दै ध्यानाकर्षण भएको उनीहरुको भनाइ छ । ‘यस विषयलाई पुनःविचार विमर्श गरी रुपन्देही जिल्ला अन्तर्गत रहेका स्थानीय तह (गाउँपालिका र वडा) का पदाधिकारी र हामी भातृ संगठनको उपस्थितिमा उक्त निर्णय सच्याइ सर्वसम्मतिमा निर्णय गरियोस्, ध्यानार्कषण पत्रमा लेखिएको छ–‘हाम्रो माग उचित रुपमा सम्बोधन नगरे कडा कदम चाल्न बाध्य हुनेछौं ।’

स्थानीय तह र भातृ संगठनलाई नजरअन्दाज गरेर राप्रपा जिल्ला कार्यसमिति रुपन्देहीले कुनै पनि कार्यक्रम, बैठक, सभा, सम्मेलन गर्दा उक्त कार्यक्रमलाई सम्बोधन गर्न आउने पार्टीका शिर्ष नेता गणहरुलाई कालो झण्डा देखाइ नाराबाजी समेत गर्न बाध्य हुने उनीहरुले चेतावनी दिएका छन् । त्यस्तै आफूहरुले उठाएका मागलाई न्यायोचित ढंगले सम्बोधन नगरिए भातृ संगठनका सम्पूर्ण पदाधिकारीले संयुक्त राजीनामा समेत दिन बाध्य हुने ध्यानाकर्षण पत्रमा उल्लेख गरेका छन् ।

स्थानीय तह परिचालन विभाग रुपन्देही जिल्ला संयोजकमा प्रज्वल बोहरालाई चयन गरिएको छ । प्रज्वल राप्रपाका वरिष्ठ नेता तथा पूर्वमन्त्री स्वर्गीय दीपक बोहराका सुपुत्र हुनुहुन्छ । राप्रपाका उपाध्यक्ष एव स्थानीय तह परिचालन विभाग प्रमुख धु्रव बहादुर प्रधानले प्रज्वल बोहरालाई विभागको रुपन्देही संयोजकमा चयन गरिएको बताउनुभएको छ ।