Advertisement 1

सतेन्द्र मिश्र/रुपन्देही

ईलाका प्रहरी कार्यालय बेथरीले नागरिकप्रति उत्तरदायी, प्रभावकारी र गुणस्तरीय सेवा प्रवाहलाई अझ सुदृढ बनाउने उद्देश्यसहित सार्वजनिक सुनुवाइ कार्यक्रम सम्पन्न गरेको छ। मिति २०८२ मंसिर ३ गते बुधबार मायादेवी गाउँपालिका–६ स्थित आमा समूहको भवनमा आयोजित उक्त कार्यक्रमको सञ्चालन प्रहरी सहायक निरीक्षक अर्जुन न्यौपानीले गरेका थिए। कार्यक्रमकी अध्यक्ष प्रहरी निरीक्षक सबिता जी.सी.ले समुदाय र प्रहरीबीच विश्वास, सहकार्य र पारदर्शिता बढाउन यस्तो सुनुवाइले महत्वपूर्ण भूमिका खेल्ने बताउँदै नागरिकका सुझाव र गुनासोलाई संस्थागत रूपमा सम्बोधन गर्ने प्रतिबद्धता व्यक्त गरिन्।

Advertisement 2

कार्यक्रममा विशेष अतिथि रूपमा मायादेवी गाउँपालिका–७ का वडा अध्यक्ष शैलेन्द्र कुमार पाण्डे तथा सियारी गाउँपालिका–३ का वडा अध्यक्ष उपस्थित थिए। उनीहरूले स्थानीय शान्ति–सुरक्षा, सामाजिक अपराध नियन्त्रण, ट्राफिक व्यवस्था, घर–घरमा हुने विवाद, मदिराजन्य समस्या तथा युवामा बढ्दो जोखिमपूर्ण गतिविधिलाई रोक्न प्रहरी–समुदायको सहकार्य आवश्यक रहेकोमा जोड दिए।

सामाजिक अभियन्ता, शिक्षक, विभिन्न संघ–संस्थाका पदाधिकारी, वडा सदस्य, भूतपूर्व प्रहरी तथा स्थानीय जनसमुदायको उल्लेख्य सहभागितामा सम्पन्न कार्यक्रममा सहभागीहरूले आफ्नो क्षेत्रमा देखिएका चुनौती, समस्या र सुधारका सुझावहरू खुला रूपमा राखेका थिए। प्रहरी पक्षले उठाइएका विषयहरूको समाधानका लागि आवश्यक पहल र सहकार्य गर्ने आश्वासन दिँदै कार्यक्रम सफलतापूर्वक सम्पन्न भएको जानकारी दिएको छ।