Advertisement 1

मायादेवी गाउँपालिका, कपिलवस्तु, ५ जुन २०२५

Advertisement 2

विश्वभर ‘Ending Global Plastic Pollution’ भन्ने नारासहित मनाइएको ५३औं विश्व वातावरण दिवसको अवसरमा कपिलवस्तुको मायादेवी गाउँपालिकामा विशेष वृक्षारोपण तथा सरसफाइ कार्यक्रम सम्पन्न भएको छ।

कार्यक्रमको आयोजना मायादेवी गाउँपालिका–१ पकडी चौकमा गरिएको थियो। कार्यक्रममा प्रमुख प्रशासकीय अधिकृत कृष्ण प्रसाद तेली, वडा नं. १ का अध्यक्ष इसाहाक मुसलमान, इलाका प्रहरी कार्यालय पकडीका प्रमुखसहित ट्राफिक प्रहरी टोलीको उल्लेखनीय उपस्थिति रहेको थियो।

स्वास्थ्य शाखा प्रमुख महेन्द्रप्रसाद यादव, पशु शाखा प्रमुख परमेश्वर यादव, गाउँपालिकाका कर्मचारी श्याम विक, बेर्तुला धुनिया, बिरेन्द्र यादव लगायतका कर्मचारी, वडा सदस्यहरू, भलाद्मी नागरिक तथा स्थानीय जनता समेत सक्रिय रुपमा सहभागी थिए।

सरसफाइ कार्यक्रम महालक्ष्मी बैंकदेखि लक्ष्मी बैंक र एनआइसी एसिया बैंकसम्म गरिएको थियो। कार्यक्रमलाई थप प्रभावकारी बनाउन इलाका प्रहरी कार्यालय पकडीको सामुदायिक प्रहरी साझेदारी कार्यक्रमद्वारा पनि सहयोग गरिएको थियो।

प्रमुख प्रशासकीय अधिकृत कृष्ण प्रसाद तेलीले कार्यक्रममा भन्नुभयो, “आफ्नो गाउँ आफैँ सफा गर्नु पर्छ, सफा ठाउँमा रोग लाग्दैन। कुकुरले पनि जहाँ बस्छ, आफ्नो पुच्छरले सफा गरेर बस्छ, हामी त मान्छे हौं।”

त्यसैगरी, कार्यक्रमका दौरान प्रमुख चिकित्सकले स्वास्थ्य र सरसफाइको सम्बन्धबारे प्रकाश पार्दै भन्नुभयो, “हामी चेतनशील प्राणी हौं, सफा रहनु नै स्वस्थ रहनु हो।”

पशु शाखा प्रमुख परमेश्वर यादवले पनि सरसफाइ र वातावरणीय सन्तुलनको आवश्यकता औंल्याउँदै, “हामी आफै सचेत भएर सरसफाइ गर्नुपर्छ। अरूको भरमा नबसौं,” भन्ने सन्देश दिनुभयो।

कार्यक्रममा युवा नेता तथा समाजसेवी चन्द्रकुमार शर्माको पनि सक्रिय सहभागिता रहेको थियो।

मायादेवी गाउँपालिका अध्यक्षले सरसफाइ मात्र नभई वृक्षारोपणको महत्त्वलाई जोड दिँदै भन्नुभयो, “वृक्षारोपण गर्नु अत्यावश्यक छ, किनकि वृक्षबाट प्राप्त अक्सिजनले नै हाम्रो जीवन सन्तुलित राख्छ। ‘हरियो वन नेपालको धन’ भन्ने नारालाई व्यवहारमा उतार्नुपर्ने बेला आएको छ।”

कार्यक्रमले वातावरणप्रति स्थानीयवासीको जागरुकता अभिवृद्धि गर्नुका साथै हरियाली र स्वच्छ समाज निर्माणतर्फ सकारात्मक प्रभाव पार्ने विश्वास व्यक्त गरिएको छ।