कपिलवस्तु क्षेत्र नम्बर १ मा स्वतन्त्र उम्मेद्वारका रूपमा मैदानमा रहेका आशिष शर्माको घरदैलो अभियानमा उल्लेखनीय जनसमर्थन देखिएको छ। मायादेवी गाउँपालिका वडा नं. १, पकडीमा आयोजित घरदैलो कार्यक्रम उत्साहपूर्ण सहभागितासहित सम्पन्न भएको छ।
घर–घर पुगेर मतदातासँग प्रत्यक्ष संवाद गर्दै शर्माले स्पष्ट सन्देश दिनुभयो, “अबको राजनीति आम जनसमुदायबाट टाढा होइन, अझ नजिक र उत्तरदायी हुनुपर्छ भन्ने मेरो विश्वास छ। मञ्चमा तयार पारिएका प्रश्नभन्दा पनि हरेक घर–आँगनबाट उठ्ने वास्तविक आवाजलाई इमान्दार जवाफ दिन म प्रतिबद्ध छु।”
स्थानीयवासीहरूले देखाएको विश्वास र आत्मीयताले आफूलाई अझ दृढ बनाएको उहाँले बताउनुभयो। “मायादेवी–१ मा पाएको प्रेम र भरोसाले मेरो अठोट झन् बलियो बनाएको छ,” उहाँले भन्नुभयो।
निर्वाचन कार्यालयले शर्मालाई चुनाव चिन्ह ‘जिप’ प्रदान गरिसकेको छ। घरदैलोका क्रममा समर्थकहरूले जिप छापमा मतदान गर्न आग्रह गर्दै उत्साह व्यक्त गरेका थिए।
पकडी क्षेत्रमा देखिएको सहभागिता र समर्थनलाई स्थानीय स्तरमा बढ्दो जनलहरका रूपमा विश्लेषण गरिएको छ। स्वतन्त्र उम्मेद्वारका रूपमा उठेका शर्माको अभियानले चुनावी माहोल थप तातेको देखिन्छ।
प्रतिक्रिया दिनुहोस्